Khamiis 06 March 2014 Lawyacado (Halbeegnews)– Ciidanka Tulbataariyada ee la dagaalanka Kootarabaanka ee  wasaaradda Maaliyadda ayaa albaabada u laabay Xafiiska Laanta Socdaalka ee Xuduudka Lawyacado, iyagoo Askarta Xafiiskaasi ka qaaday shaanbadii ay kus haqaysan jireen.

Wariyaha Farriinnews.com ee Gobolka Salal ayaa soo wariyey goor dhaweyd in khilaaf illaa muddo soo taxnaa uu keenay in labada ciidan awood isku adeegsadaan kadib markii ay isku maan-dhaafeen hanaanka Maamul ee u dhaxeeya kaasoo xal loo waayey.

Wariyuhu waxa uu ku soo waramayaa in saaka Ciidanka Tulbataariyada ee Lawayacado ay xoog ku qabsadeen xafiiska laanta socdaalka isla markaana ay ka qaateen qalabkii ay ku shaqaysan jireen, gaar ahaana Shaanbadii iyo waraaqihii.

Talaabada Ciidanka Tulbataariyadu ku talaabsadeen ayaa keentay in hawlihii xafiiska laanta socdaalku istaagaan isla markaana dadka socotada ahi ay kala kulmeen dhibaato, maadaama labada dhinac dadka u kala safrayaa adeegsan jireen shaanbadaha Enrty-ga iyo Fiisayaasha.

Illaa hada ma muuqato talaabo ay Xukuumadda dhexe ka qaadatay dhacdadan oo ah mid fool xumo ku ah nidaamka wadashaqayneed ee Xafiisyadan.

Waaheen

Halbeegnews, Hargeysa

contact@halbeegnews.com

Khamiis 06 March 2014 Burco (Halbeegnews)– Sida wararku Halbeegnews ku soo gaadhayaan wasiirkii caafimaadka Somaliland Saleeban Ciise Kaar Xaglatoosiye ayaa goor dhawayd iska casilay xilkii wasiirnimo ee uu Somaliland ka hayey, isagoo sheegay inuu shir jaraa’id ku qaban doono gudaha magaalada Buhoodle oo boqolaal qof oo taageerayaashiisa ahi ay ku sugayaan inay ku soo dhaweeyaan.

Mr. Xaglatoosiye oo habeen hore si dhuumasho ah kaga soo baxay magaalo madaxda Somaliland ee Hargeysa, ayaa waxaa laga soo daba diray wefdi wasiiro ah si ay usoo lad qabeeyaan, kuwaasi oo habeenkii xallay ahaa ku negaadiyey gudaha magaalada Burco, balse wararka na soo gaadhaya ayaa tibaaxaya in Xaglatoosiye iyo wasiiradda kale oo wada hadal u socday aan wada hadaladaasi wax natiijo ah laga gaadhin.

Xaglatoosiye ayaa ka cadhooday go’aan aad u khariban oo ninka Taliyaha ciidanka qarranka Somaliland ah Mr. Shaqalle oo maalmahii ugu danbeeyeyba cabashooyin is dul barkani ka soo gaadhayeen unugyada ciidamaddu, uu mushaharkii ay qaadanayeen ka joojiyey 150 maleeshiyo ka soo jeeday deegaanka Buhoodle oo la socotay Xaglatoosiye, isla markaana qayb ka ahayd heshiiskii Xaglatoosiye la gallay Somaliland, iyo weliba in Mr. Xaglatoosiye loo gacan dhaafay arrimaha beriga Somaliland.

Wararka Halbeegnews hellayso ayaa tibaaxaya in Xaglatoosiye qoraalka is casilaadiisa ah uu ugu dhiibay madaxweyne Siilaanyo xubnaha wasiiradda ah ee la joogay, Xaglatoosiye iyo Xirsi Cali Xasan ayaa khilaaf aad u murugsani maalmahii ugu danbeeyeyba ka dhexeeyey.

Wararka arrinta ka soo kordha kala soco Halbeegnews

Halbeegnews, Burco

contact@halbeegnews.com

Jimce 07 March 2014 Hargeysa (HALBEEG)– Maalmo ka dib markii Somaliland xornimadeeda ka heshay gumaystahii Britain, isla markaana ay magaalo madaxdii Somaliland ee Hargeysa dib ugu soo laabteen ergadii soo saxeexday madax banaanida Somaliland oo uu horkacaayey alla qabriga ha u nuuro eh Maxamed Ibraahim Cigaal, ayuu hadal u jeediyey baarlamaankii ugu horeeyey ee xorta ahaa ee Somaliland yeelato 1960 kii 29 June, laba maalmood ka hor markii midnimadii labada dhinac la bud dhigay.

Haddaba khudbaddaasi ayaanu idiin soo gudbinayna hoos ka dhegayso

Hoos Ka Daawo Markii Dadka Reer Hargeysa Ku Qasbayeen Baarlamaankii Somaliland In Midnimada La Dedejiyo guji sawirka isbedelaya

Halbeegnews, Hargeysa

contact@halbeegnews.com

Jimce 07 March 2014 Hargeysa (Halbeegnews)–Wasiirka duulista hawada Somaliland, Maxamuud Xaashi Cabdi ayaa ugu yaraan $60,000 (lixdan kun oo dollar) oo ahayd dakhli ay leedahay wasaarada maaliyadu si sharci daro ah sanadkii 2013-kii ugala wareegay shirkadaha diyaaradaha ee ka hawlgala dalka Somaliland.

Lacagtan oo wasiirku uu ku magacaabay Fee sanadeedka cusboonaysiinta ruqsada (license) waxa shirkadaha wasiirka uga soo ururiyey mulkiilaha xafiiska jara tigidhada diyaaradaha ee Safeway Cumar Siciid Ducaale kaas oo dabayaaqadii sanadkii hore lacag ay dawlada UK bixisay wasaarada duulista ugu soo iibiyey laba bas oon si fiican u shaqaynayn.

Wasiirka duulista Maxamuud Xaashi ayaa mudo saddex sanadood lagu qiyaaso waxa xafiiskiisa ku soo xaroonayey lacag dhan $13 taas oo laga qaado qof kasta oo ka dhoofaya madaarada Somaliland.

Lacagtan oo ah mid aan wasiirka lagala xisaabtamin (unaccountable) waxay isugu jirtaa $10 (toban dollar) oo ay naasha u qabato iyo Saddex dollar oo ay maaliyadu u qabato. Waxa intaas dheer hal dollar oo laga qaado gaadiidka galaya Madaarka oo wasiirka gaydhka loogu qabto.

Dhinaca kale waxa soo shaacbaxaya warar sheegaya in laba wasiir oo uu ka mid yahay Maxamuud Xaashi iyo masuuliyiin kale oo ka tirsan dawlada ay isku dayeen iyagoo cadaalada majaro habaabinaya inay dambabasaan arimo iyo kiisas halis ku ah amniga qaranka.

Wasiir Maxamuud Xaashi ayaanay noo suurtoobin inaanu ka helno waxa uu wararkan ka qabo kadib markii uu ka soo jawaab celin waayey telefoonadii aanu u dirnay.

Hoos Guji Oo Ku Guulayso 50,000 Oo Euro, Buuxi Formka Hoose Tijaabi Nasiibkaaga, Guji xidhiidhiyaha hoose

Xigasho Haatuf

Halbeegnews, Hargeysa

contact@halbeegnews.com

Hayada Barnaamijka Caafimaadka Aduunka Oo Marka Magaceeda La Soo Gaabiyo Loo Yaqaan WHO Waxay Mid Tahay Hayadaha Samafalka Ee Dalkan Somaliland Ka Shaqeynayey Mudada Dheer Iyadoo Sanad Walba Sida Ay War Bixinteeda Ku Sheegto U Qoondaysa Dalkan Somaliland Malaayiin Doolar Oo Caawimo Caafimaad Ah Hase Yeeshee Caawimadaasi Meesha Ay Aakhirka Ku Danbayso Waa Mid Fari Ku Godan Tahay Oo Su,Aalo Badan Layska Waydiin Karo Doodina Ka Dhalan Karto.

Dhamaanba dadyowga dunida waxaa ay marag ka yihiin mashaariic kala duwan oo loogu muujinayo in wax loogu qabanayo isla markaana ay dhegaha shacabka kusoo noqnoqdaan Hayadaha taakuleeya Dadyowga ku nool dunida Sadexaad oo loola jeedo Afrika kuwaasi oo iyagoo yoolkooda Meel marsanaya ku tilmaama in qaarada afrika Ama dunida Sadexaad ay halakeeyeen Abaaro,Colaad,Gaajo iyo Cuduro  aan soo dhamaan oo marba marka ka danbaysa sii xoogaysta.

Hadaba iyadoo ay sidaasi tahay waxaa lagama maarmaan ah side ayaa look ala qorsheeyaa samaynta Colaadaha ee qaarada afrika iyo kala Googoynta dalalka qaaradani oo ay dhufayska ugu jirto Urur loo samaystay Fulinta mashaariicdaasi loona yaqaan UN ama qaramada Midoobay.

Mashaariicdan ayaa si dadban waxaa loo soo mariyaa Ururka qaramada Midoobay oo ay iska leeyihiin Wadamada reer galbeedku kuwaasi oo u samaystay inay ku meel marsadaan qorshayaashooda ay ka damacsan yihiin dunida muslinka waxaana kuu cadayn karta sidii yuhuuda loogu dhex beeray bariga dhexe looga dejiyay dhulka reer falastiin iyadoo ay taasi kasii daran tahay in Dawladaasi islaamka ahayd ee Falastiin ay sheegeen inay ka saareen wadamada dunida lagana masaxay calankeeda iyo dhulkeeda halka ay aqoonsadeen  Wadan ay u bixiyeen Israaiil.

Sidoo kale barnaamijka ay ugu magacdareen caafimaadka dunida oo aynu u bixinay una bedelay DIKTOOR CUDUR SIDA waxaa aynu ku iftiimin doonaa sida dadyowga dunida ee dadkoodu  u korayaan una badanayaan si aanay horumar u gaadhin ama aanay isku filaansho u gaadhin waxaa qaarba loola dhaqmaa si gooni ah oo dalba loo aafeeyo looguna sameeyo masiibooyin iyo dhibaatooyin ka ilaaliya inay ka shaqaysiiyaan Maskaxda isla markaana u Fekeraan ama u hiigsadaan Iyaga.

Dalalka qaar ayaa waxaa loo sameeyaa xanuuno iyo fayrasyo kala nooc ah oo dadkaasi lagu gumaadayo ayna ka mid yihiin dalalka loo isticmaalay China oo loo habeeyey BIRD FLUE ama Hargab Shinbireed & SWUNE FLUE  ama Hargab Doofaar  waxaa ay shacabku isku dayayaan iyo dawladooduba inay la tacaalaan xanuunkan fayraska ah eek u habsaday kaasi oo isagoo Moor ah dalkooda si qarsoodi ah loo soo geliyay ay xanbaarsanaayeen Hayadaha Caafimaadka ka shaqeeya ee ay iyagu ugu talogaleen Sida WHO iyadoo welibana aan sidaa lagaga hadhayne misna si dhaqaalahooda loo wiiqo lasoo samaynayo Fayraskaasi Dawadii lagu dilayay oo Malaayiin doolar  Lagu qaadanayo waxaana lasoo marinayaa Hayado loo samaystay looguna talogalay inay dadka iyo dowladaasba u aragto inay tahay hayad ka naxaysa shacabkooda isla markaana la dagaalamaysa xanuunkan.

Dalalka qaar ayaa waxaa lagu furaa Masiibooyin dad same ah ayna ka mid tahay sida dalka somaliya oo ay ugu horayso Alshabaab oo loogu talogalay in dadka reer galbeedka iyo kuwa aan diinta islaamka haysan oo dhan lagu nacsiiyo diinta Muslimka kuwaasi oo loogu talogalay in looga xanaaqo diinta islaamka loona tusiyo in diintaasi tahay taas dadka aan waxba galabsan laynaysa,qaraxyada dhiirigelinaysa cid kastana Afduubaysa,Maadaama ay ogyihiin in diinta muslimku ay tahay mid xaaraan tinimaysay dhiiga qof aan waxba galabsan isla markaana ay amaan siisay Gaalka kula jooga,taasina waxay kuu cadayn karaysaa in meelo kale laga soo amaamuday Xagjirka diinta Islaamka dadka necbaysiinaya laguna banaysanayo dhiiga muslimiinta iyo ku duulitaanka dalalkooda si loo hantiyo khayraadka ku dihin iyo weliba dulaynta dadkaasi iyadoo ay taasina dheer tahay Sidii aanay haba yaraatee dadkaasi u gaadhin Wax horumar ah ayna ku mashquulaan  iska difaacida alshabaab waxaana sidoo kale inta badan dadku maqlaan saraakiil Alshabaab ah oo gantaal lagu khaarajiyay balse ragaasi la dilay ama la qabtaa waa kuwa ka horyimaada maslaxada cidii ururkan samaysatay.

Taasi waxaa kasii daran kooxo kale oo lagu magcaabo BUDHCAD BADEED looguna talogalay in duulaan qaawan oo lagu guranayo khayraadka iyo kaluumada kala duwan ee dalka somaliya sidoo kalena lagu aasayo Hadhaaga suntan Wershadahooda waxaana qorshayaasha lagu gabanayo ka mid ah inay yihiin wadamada ku midoobay la dagaalanka Budhcad Badeeda somaliya,waxaana ay tani timi ka dib markii kaluumaysato masaakiin ah oo ka dhiidhiyay markay arkeen xeebahoodii oo maraakiib shisheeye xaalufinayso ay iska difaacaan waxaana  laga daba raray kooxo iyagu u qaybsanba afduubista maraakiibta  kuwaasi oo lacagta ay ku shaqaynayaan isla markaana ku xoogaysanayaana loo soo mariyo Madax furasho iyaga dib loo siiyo Halka qaarkoodna si aan Mashruucu U Fashilmin La Khaarajiyo taasina waxay indha saabaysaa in dadku ay u fekeraanba inay iyagu ku shaqaystaan Budhcadan.

LASOCO QAYBTA LABAAD

Waxaynu kasoo hadalay oo aynu ku soo qaadnay qormadii tan ka horaysay qiima beelka uu qaadku inaga dhigay iyo sida uu inoo baabashay dhaqaale ahaan iyo caafimaad ahaanba isla markaana uu inooga dhigay umad dad u xaniban oo lahaystayaal ah markaan sidaa leeyahay waxaan u jeedaa waxaynu u shaqaynaa waa dadka qaadka beerta ee itobiyaanka ah waxaana taasi marag ka ah dhaqaalaha bilaa xisaabta ah ee habeenkii ku xeroota itobiya waxaan u tabacnaa waa qaad sidaa awgeed waxaan odhankarnaa waxaan nahay umad lahaystayaal u ah wadan kaasi aan soo sheegnay.

hadaba maanta waxaan ka hadli doonaa masuuliyad darada inagu dhacday waliba gaar ahaan raga taasi oo uu sabab u yahay qaadku waxaan ilawnay masuuliyadii ilahay inoo dhiibay ee ahayd inaan aduunka masuul ka ahaano taasi oo aan gabi ahaanba dayacnay.
waxaa kale oo aan dayac nay tii ama masuuliyadii gaarka ahayd ee aynu masuulka ka ahayn qoysaskeena waxaad maalin walba maqlaysaa ama arkaysaa qoysas kala yaacay oo burburay marka si qoto dheer loo baadhana waxaad ogaanaysaa in uu qaadku sababay kala tagaasi.
waxaad subax walba aragtaa waliba salaada hore intaan subaxa latukan dumar kalahaaya oo yaacaaya isla markaana shaqa tagaaya markaad baadho sababtana waxaad ogaanaysaa in markii ay ragii qaad cun wada noqdeen ee ay saaqideen ee ay masuuliyadii reerkiisa ka saaranayd ay dayaceen dabeeto iska seexdeen dumarkiina ay ku kaliftaay inay shaqo tagaan una soo dhiciyaan ubadkoodu waxay ku noolaan lahaayeen ee cuno lahayd ee cabid lahayd ee hoy lahayd ee hu ama dhar lahayd ee dusiga waxbarasho ama jaamacad lahayd masuuliyadahaasi ama waajibaadkaasi oo dhamaan saarnaa ninka ama aabaha ilahayna ku waajibshay inuu isagu guto balse waa ka gaabshay waxaana sababay waa qaaka waayo waxaa uu kaa dhigayaa manaxaan doqon ah oo aan kala aqoon waxa u dan ah iyo waxa aan u dan ahayn inuu sidaa garto iska dhaafoo waxaaba uu ku siganayaa inuu caruurta xaraasho ama uu rahmo waxaanan aamin sanahay in taasi dhici doonto hadaan sidan wax laga badalin waxana laga yaabaa inay dhacdayba.

Hadaad aado ama aad qabato suuqyada qaadka lagu gado waxaad arkaysaa oo markaaba indhahaagu qabanahayaan wiil ama nin maqiiqan oo raba inuu qaadka gato lacagna gacanta ku sita waxaa uu ku qaylinayaa aniga ha iga kala qaybin taasi oo macneheedu tahay waxaad iga gadaa kiilooga oo dhan markaad isaga usii fiirsatana waxaa laga yaabaa inaanu qadayn oo uu gaajoonaayo isla markaana waa aradan yahay waa caga cad yahay waana maryo xunyahay qoyskiisiina hadalkiisaba iska daa hadana waxaa uu sitaa lacag badan meel uu ka keenaba waa keenayaa ilayn qaadkiiba ku xidhane xataa waxay ku kalifaysaa inuu masaajid ka istaago oo yidhaaho waan baahanay oo caruurtaydii dab looma shidin ama uu yidhaaho islaantiibaa iga dhimatay oo uu maalinba qof dilo runtii waxaasi oo karaamo xumo ah waxaa iska leh oo aabo u ah qaadka.

dhinaca kale waxaad arkaysaa nin wayn oo sharaf leh oo suuqa badhtankiisa gabadh qaadka gadaa ku qaan dhabayso isaga iyo waalidkiiba caayeyso oo kaladhka shaadhka haysato magaalada oo dhamina daawanayso isna aad yaabayso waxa dhaar beena uu daldalaayo ee uu leeyahay hadaan keeni iyo wax lamid ah waxaa laga yaabaa ilayn waa magaalo meeshuye in qof ay xil isku leeyihiin oo uu sodog u yahay ama isgaba u ah ama uu seediba u yahay ama isagaba u ah ama dumaashidiis ama kaaga darane sodohdii ama gabhiisiiba ay meesha soo maraan dabeeto la arko xaajigii oo gabdhi kaladhka haysato oo ladaawanaayo oo been fara badan ku tiraabaaya waxaasi oo sharaf beel ah waxaa hooyo u ah waa qaadka.

waxaa dhacday in nin reer  hargeisa ahi uu xiligii aynu ku jirnay daydayga iyo dagaalada uu mudo reerkiisa ka maqnaa oo uu duurka jiifay dabeeto habeen habeenada kamid ah ayuu taagiisa is dhahay reerkaagii iyo caruurtaadii soo eeg waxaa uu soo galay tuuladii ay daganaayeen nasiib daro waxaa uu fadhiistay maqaaxi qaadka lagu cuno waxaa uu dalbaday nooci ugu danbeeyey qaadka maalintii oo dhan ayuu halkaasi qaadka ku cunaayey markay goordanbe oo habeenimo ah marayso ayaa waxaa uu si waali ah oo aan fayoobayn ugu dhaqaaqay xagii uu is dhahaayey waa kaa xigaa reerkii ama gurigii markii uu gurigii gaadhay waxaa uu u tagay xaasikiisii oo gabadh yar oo uu dhalay dhabta ku haysa xanuun daraadeed gabadha yari waa qaylinaysaa ama waa ooyeysaa xanuunkuna waa ku daran yahay ninkani mudo dheer muu arag gabadhan yar iyo hoyadeed toona si naxariis daro ah ayuu ula hadlay dabeeto waa iska jiifsaday ilayn waa naf gubanaysee waxaa uu hayn waayey qayladii yartii yarayd ee xanuunku hayey intuu gabadhii su xun oo bilaa naxariis ah ula hadlay ayaa waxaa uu yidhi nayaa waa naagta bax oo dibada ku hay aanu kaa seexanee, halkaa markaad qiimayso qof damiir leh na aad tahay waxad holanaysaa oohin iyo ilmo waayo waxaad is dhahaysaa waar ninku doqonsanaa oo cadaawaysana miyaanu gabadha isagu dhalin miyanay ahayn jiidhkiisii miyaanu xishood iyo naxariis u lahayn miskiinadan dhabta ku haysa, ha layaabin waxaasi oo gobanimo daro ah ee doqoniimo ah ee naxariis daro ah ee masuuliyad daro ah waxaa aabo iyo hooyo u ah waa qaadka.

waxaan qormadeenan maanta ku soo gaba gabynaynaa walal iska jooji qaadka waa if iyo aakhiro xumo waa haligaad aad naftaada halaagayso aakhirana waa cadaab ifkana waa nolol qadhmuun oo sanka lagaa haysto.

guntii iyo gunaanadkii waxaa leeyahay xigmada ah walal ha qayilin adoo qaawan.

W/Q: JAMAAL CABDILAAHI MUXUMED ( ABU CIZA)

Hargaysa(Halbeegnews)-Dilkii Aadka U Foosha Xumaa ee Ka dhacay Magaaladad Hargaysa Dhawaana la helay gabadhii Lagu Aasay Daarad ka mida Gurigii Ay lahayd Eedeysanada loo hayo Ayaa Waxaa Warbixin Aad U Xanuun Badan ka Soo sameeyay Wariye Ka Tirsan Xarunta Radio Hirad hargaysa waxaana Dhagaysi Haboo.

Oodweynenews.com _ Oodweynenews , Oodweyne News , Somali News, And Entertainment_3

Aniga oo ah Boobe Yuusuf Ducaale oo ku hadlaya magacayga, magaca Mujaahidiinta, magaca qoyskayga iyo dhammaan inta ka damqatay dilkii foosha xuumaa ee bahalnimada ahaa ee Ruqiya Siciid Ayaanle, waxaan halkan tacsi uga dirayaa dhammaan Reer Siciid Ayaanle iyo qoyskii ay ka baxday Ruqiya. Naxariistii Janno Ilaahay ha ka waraabiyo Ruqiya, innagana samir iyo iimaan, innaga ka codsanayna Garsoorka Somaliland in gacan-ku-dhiiglayaashii abaalkooda la mariyo.

Markasta oo ay tirada dadku sii badataba waxa hubaal ah in waxyeelladooduna la korodho; markasta oo ay isku soo dhawaadaan ama isa sii dhex galaan dad ku kala geddisan dhaqan ahaan iyo caqiida ahaanba waxaan muran iyo is-maan dhaaf midna ku jirin in ay isu tebiyaan kala qaataan dhaqannada ay kala qaataan ha xumaadeen ama aha samaadeenne.

Markaad meelo badan oo kala geddisan ka eegto sooyaalka iyo geeddi socodkii iyo bilawgii nolosha Aadamaha waxaad ogaanaysaa arrimahaas aan kor ku soo sheegnay ee ay ka mid yihiin markasta oo tirade dadkku bataanba in dhibta iyo mashaakilaadkuba la sii badanayaa ka soo bilaw abuurkii nebiyulaahi Aadam; markii Rabbi abuuray nebi Aadan isaga oo ku nool jannada Eebbana ku yidhi “Cun oo cab waxkasta oo halkan ahaaday, marka laga reebo geedkaa” Geedkaas oo ahaa mid Rabbi cilmigiisa ugu diiday.

Iblays baa nebiyulaahi Aadan ugu sheekeeyeey in haddii uu geedkaas cuno waarayo mulki boqornimana uu helayo. Markii Aabbaheen Aadan ku dhacay dabinkii iblayskana waakii Alle adduunyada u soo tuuray isaga iyo hooyadeen Xaawa. Iyada oo taasi ay jirto waakii Rabbi Aadan iyo Xaawa kala siiyay ubadkoodii ugu horeeyay ee ay ka mid ahaayeen Haabiil iyo Qaabiil.

Waxaynu ku gudo jirnaa arrintii ahayd in markasta oo dadku bataanba ay dhibtu sii kordhayso’e, waa kii Haabiil dilay walaalkii Qaabiil; dilkaas oo noqday dhiiggii ugu horeeyay ee xaq-darro dhulka dushiisa loogu daadiyo.

Waxaan ognahay in markasta oo tirada dadku sii korodhaba ay mushkiladaha iyo dhibaatooyinku sii badnayeen; taas oo ay dadku gacmahooda ku kasbanayeen, markasta oo dadku bataanna dunuunta ayaa sii badanaysay iyada oo ay barbar socdaan ciqaabta Eebbe (S.W).

Aan eegno markasta oo dadka ku kala geddisan dhaqan ahaan iyo diin ahaanba ay isa sii dhexgalaan sida ay isugu tebiyaan una kala qaataan dhaqannada kala duwan ee ay kala wadataan.

Waxaynu ognahay hababkii ay u fidday diinteena suubban ee Islaamku in ay ka midtahay in rag rag iyo dumar muslimiin ahi ay la soo degeen ama yimaaddeen waddanno ay ku noolyihiin dad Asnaam caabuda iyo qaar aan diinba haysan; kadib markii ay dhaqankii iyo la noolaanshiyihii dadkii muslimiinta ahaa ee la soo degay in ay qaar badan oo dadkii waddanka loogu yimid ahaa ay qaateen diintii ay wateen dadkii dhulkooda ugu yimid markii ay arkeen wanaagga la macaamilkooda waddannadaas oo ay kamid yihiin qaar badan oo hadda ugu waaweyn dalalka Islaamka ah sida Malaysiya.

Aan eegno dhanka kale iyo sidii ay u saameeyeen dhaqannadii xumaa ee ay wateen dadkii yimid waddammada Soomaalida iyo kuwii kale ee Muslimiintu ku noolaayeen.

 Sidee ayay Soomaalidu ku baratay cabidda sigaarka? Yayse ahaayeen kuwii ugu horeeyey?

Waxay ka sheekeeyaan ama ka sheekeeyeen raggii askarta u ahaa gumaystihii Ingiriiska ee geyigan haysan jiray, marka ay saraakiisha Ingiriis ay cabbaan sigaarka, waxay halka ay fadhiyeen ama joogeen kaga tegi jireen baakidhka ama daasadda uu ugu jiray sigaarku si ay uga daba qaataan ciidanka Soomaalida ah ee ku sugan xeradu si ay u bartaan cabbidda sigaarka si uu u yeesho saylad dhaqaale oo hadhaw maaliyadi ka soo gasho dawladda Biritish-ka.  Sidoo kale markii ay dawladdihii ugu horeeyay ee Soomaalidu samaysmeen, waxa saraakiisha soomaalida loo diri jiray waddanka Ruushka ee Midawgii Soofiyeeti, si ay aqoon korodhsi la xidhiidha shaqadooda ugu soo qaataan dalkaas Ruushka; Raggaas la diray badankoodu waxay soo noqon jireen iyaga oo khamriga caba, marka la weyddiiyana waxay odhon jireen “Meeshaas aannu aadnay, waxay ahayd meel aad u qabaw; sidaa awgeed ana oo diirimaad iyo dhaxan duulin ka eegayna ayaannu isku kululayn jirnay”  halka qaarkoodna ay ka soo laaban jireen iyaga oon balwaddaas qariban lahayn.

Aan u soo noqdo abaarya iyo ujeedada odhaahdayda kor ku xusan ee ah Filimaanta Musalsal-ka ah iyo saamaynta ay ku keenneen bulshadeena eegga ee aadka u daawata; waxa marag-ma-doon ah in ay iska caddahay haddaan indhaha laga qarsanayn wax-yeellada aflaamtaasi; kuwaas oo badi ka hadli arrimo la xidhiidha qoyska iyo dhaqan-xumo dhexdiisa ka alloosanta sida: Gabadha la qabo oo nin keeda khiyaamaysa, gabadh laba nin isku wadda, gabadh xaasleh oo nin kale la socota, hantida ninkeedana nin kale ku gunnaynaysa, nin gabadh la qabo gaabsi (Sino) ka doonaya, qof shirqool lagu dilo, mid la sumeeyo iyo in kale oo la fawaaxish iyo fool-xumo-dhagareed ah.

 Waxa indhawaaleba laga maqlayay magaalada Hargsya inta kale ee aafada Filimaantana ay ku fidayba waxyaabo aan dhaqan ahaan, diin ahaan, dabeecad ahaan iyo dadnimo ahaan midna u habboonayn.

Waxaan ku soo af-meerayaa odhaahdayda haddii aanay dadka iyo dawladdu iyaga oo ilaalinaya jiritaankooda aanay meel uga soo wada jeedsan waxyaabahan aafada umadeed ah ee ka socda geyigeenna ee xumaantii lala xishoon jiray caadiga ka dhigay in ay inagu iman karto is-waa iyo dhalan rogad ballaadhan oo dhaqan doorsoon ah.

Waxay filimaantani wax iska caadiya ka dhigeen is-dhexgalkii dadkii kala caaganaa, waxaanay gooyeen dabar adag oo dhaqnka soomaalidu lahaa sida; soddohda iyo inankii inanteeda qabay ee xilka isku lahaa oo cay iyo af-xumo is-dhaafsanaya, soddoggii iyo soddohdii oo si aad u qariban u wada hadlaya, soddog inantii inankiisu qabay damac guur iyo hunguri ka galayo oo la haasaawaya iyo waxyaabo kale oo xataa damiirkaaga qofnimo diidayo; waxyaabahaas ayaad arkaysaa iyada oo ay aad u daawanayaan, ku  xisaabtamayaan una beretamayaan hablo aan qaan-gaadhin oo da’adoodu aad u yartahay; kuwaas oo marka ay arkaan waxan ay hooyooyinkoodba la daawanayaan in ay yihiin wax iska caadiya; kasii darane waxa loogu turjumay af ay wada fahmi karaan.

Guntii iyo gebagebadii qoraalkaygan waxaan ku soo gunaanadayaa haddii aynu doonayno qaran hufan oo hagaagsan, waa in aynu helnaa qoys habboon oo hanuunsan.

 Marka qoyska hoos laga dhisaa, qaran hagaagaagye

Haddii meel saruun laga qabsado, waa qalfoof madhane

Dadkuna qaabaddaasoo kaluu, qayb ku leeyahay 

Qacda hore haddaan ubadka kaca, qayrka lagu leexin

Hadhaw baan la soo qaban karayn, qaladkay gaystaan

Ayaasiin55@hotmail.com

Qalinkii Axmed-Yaasiin C. Raxmaan Axmed (Dool)

Maxaa Sababay Dudmada Xagle Toosiye ,Bahda Garsoorkuna  Waa Kuwan Sidii Fiinta Qayliyaye Fartoodii yaa Subaga Daray,Manaamka ama Riyada uu Siilaanyo Dalka ku Xukumana Fasirkeeda yaa Loo Daba Fadhiistaa?

Maah maah soomaliyeedbaa jirta oo tidhaahda ninka faras dabadii ka degay meel u dhaantuu waayey, saleebaan Ciise Axmed Xagle Toosiye waa wasiirka caafadimaadka ee somaliland ,waxa uu tabanayo hadii uu arkayo madqaxweyne uu kala hadli karo oo wax ka qaban kara wuu kala hadli lahaa markiise uu waayey madaxweyne uu la hadlo waxay dantu baday in uu iska tago,wasiir xagle toosiye waxaa ku adkaatay wasiir ay sharci ahaan siman yihiin in uu ka amar qaato oo uu u aqoonsado in uu yahay madaxweyne la doortay.

Akhristow maah maah soomaliyeedbaa jirta oo tidhaahda waysha gawrac dibigu ha ku quustee ,Saylici waa madaxweyne ku xigeen isaga iyo siilaanyona marbaa la wada doortay cod isku mid ahna waa lagu doortay ,hadana wax qarsoon may ahayn in saylici uu mudo laba jeer ah ka duday xafiiskiisa oo labada jeerba uu soo ladqabeeyey gudoomiyaha wakiilada C/raxmaan Cirro iyo xildhibaano isugu jira labada gole ,hadaba saaxibayaal marka aad maskaxdiina baadhaan waxaad markiiba xasuusanaysaan talow ma waxaa isku dhacay oo wada shaqeyn kari waayey madaxweynaha iyo ku xigeenkisii sidii koonfurta suudaan oo kale.

Hadaba arinta somaliland taasi way ka duwan tahay oo ninkii Saylici ay is hayeen muu ahayn madaxweyne siilaanyo wuxuu se ahaa wasiirka amdaxtooyada Xirsi wixii la isku hayeyna waxay ahayd fasiraada riyada madaxweynaha anigaa xaq u leh in aan fasiro , iyadoo uu saylicina uu u arkayey in uu meel uu u soo maraba waayey mar hadii uusan madaxweynuhu uusan soo jeed dalka ku xukumeynin in fasiraadii riyadiisana loo sameystay dad kale ,arintanina waa daliil labaad oo muujinaya ama u marag furaya talaabadan uu qaaday wasiir xagle toosiye waxaanu door biday intii ay dumar iyo caruur ay burmi lahaayeen in uu iska tago mar hadii uusan jirin madaxweyne uu la hadlo.

Todobaadkii hore ayay ahayd markii uu gorsoorku sida fiinta uga qayliyey cadaalad darada dalka ka  jirta madax banaani la’aanta ka jirta hayadda garsoorka iyo fara gelinta ay ku hayaan wasiiro ka tirsan xukuumada siilaanyo ,iyagoo soo bandhigay cadeymo ama qoraalo ay maxkaamda gobolka hargeysa u soo qoreen wasiiro xukuumada k atirsan oo uu ka mid yahay wasiir ku xigeenka amniga C/laahi Abokor oo isaga laftigiisu warbaahinta ka qirtay in uu maxkaamdda gobolka hargeysa u qoray warqadii la soo bandhigay  oo  nuxurkeeduna ahaa amar uu maxkamadda siinaayo wasiir ku xigeenka amnigu ,qodobo badan oo dastuurka ayaa ka hadla in ay kala badax banaan yihin sadexda waaxood ee ay dawladdu ka kooban tahay waxaana qodobadaasi dastuurka ka mid ah qodobadka 37 iyo 52 aad.

Hadaba war saxaafadeedkii sida la sheegay laga soo saaray xafiiska madaxweyne siilaanyo ee jawaabta u ahaa qaylo dhaanta ka soo yeedhay hayadda garsoorka dalka waa daliil sadexaad oo muujinaya in waxa dalka lagu xukumaa uu yahay manaab ama riyo,aduunyadana waxaa jira wax laga jawaabo iyo wax aan jawaaba lahayn ee ay haboon tahay marka aad ogaato in aad wax ka qabato ,marka ay soo dibad baxaan.

Maah maah soomaaliyeedbaa jirta oo tidhaahda nina korsiisa biyo kama hagrado .masuuliyiintan ka hadlayey cadaalad darada jirta ,madax banaani la’aanta garsoorka iyo fara gelinta qaawan ee ay wasiirada xukuumadu ku hayaan ujeedadoodu may ahayn in ay iyagu is dhaliilaan ama ay cid canbaareeyaan waxay se ahayd in khaladaadka jira ay cadaymahooda soo bandhigeen in wax laag qabto.

Hadaba masuuliyiinta warbaahinta la hadlay waxay xog ogaal rasmi ah u yihiin heerka cadaaladda ee dalku halka uu marayo waxayna la mid yihiin dhakhtar qaliin ku sameeyey qof bukaan ah shakina kuma jiro in lagu dhaqmayo talooyinka uu bixiyo dhakhtarkii qaliinka sameeyey iyo in dhakhtarka loo daba fadhiisanayo wixii wado ah ee la siinayo qofka bukaanka ah ee qaliinka lagu sameeyey.

Had iyo jeer waxa jawaab laag bixiyaa waxa aan jirin ee la sheego umadda somaliland waxaa isu qaban waayey cadeymihii ay warbaahinta u soo bandhigeen masuuliyiintii bahda garsoorku iyo jawaab celintii ka soo baxday xafiiska madaxweyne siilaanyo , oo muujineysa in war saxafadeedyada la sheego in ay ka soo baxaan xafiiska madaxweynaha in aanu jirin madaxweyne wax ka og oo soo qoraa waayo caalamka laguma arag madaxweyne u jawaabaya gudoomiye maxkamadda gobol oo ka hadlay xaqiiqo jirta oo uu cadeymaheediina soo bandhigay .

Axmed Abgaal wasiirka boosaha iyo isgaadhsiinat somaliland waxayna dad badani maanta dib u xasuusteen hadal uu yidhi xili uu siilaanyo ku jiray ololaha doorashada oo ahaa in uu siilaanyo u baahan yahay xanaano ee aanu u baahneyn in xil la saaro ,waxaana muuqata in dawada somaliland laga raadinayo meel aysan ku jirin,waxaan xasuustay maah maahdii soomaaliyeed ee ahayd nin aan wakhtigii talada joogin marka uu taliyo nin aan tegi jirin ayaa taga,marka nin aan qaybin jirin uu qaybiyana nin aan qadi jirinbaa qada, waxaanan hadalkayga ku soo gaba gabeynayaa heestii ahayd cudurka kaa gala fardaha hadii laga gubo dameer  dawada lama gaadhayo

Qof go’ay iyo roob galbeed midkoodna haduu galabado gadaal uma soo noqdo.

Hadaba isku soo wada duuboo Maxaa Sababay Dudmada Xagle Toosiye ,Bahda Garsoorkuna  Waa Kuwan Sidii Fiinta Qayliyaye Fartoodii yaa Subaga Daray,Manaamka ama Riyada uu Siilaanyo Dalka ku Xukumana Fasirkeeda yaa Loo Daba Fadhiistaa?

Qalinkii:C/risaaq Suudi Nuur

Tel:4425243

Email:suudi88@gmail.com

Hargeysa/Somaliland

Hargaysa(Halbeegnews)-Bayaan ay maanta (07/March/2014)soo saareen aqooyahanno ka tirsan Dhallinyarada Bariga Hargeysa ayaa lagu caddeeyay mawqifka ay ka taagan yihiin munaasibad ay toddobaadkii hore soo qabanqaabiyeen Ururka Tabantaabo oo ka shaqeeya horumarinta Deegaanka Bariga Hargeysa, oo uu ka qayb-galay Wasiirka Madaxtooyada Somaliland Md Xirsi Cali Xaaji Xasan. Qoraal arrinkaas ku saabsan oo soo gaadhay Laanta Warbaahinta ee Akadamiga Suugaanta iyo Waxbarashada ayaa u dhignaa sidan

“Annaga oo ah dhallinyarada aqoonyahanka ah ee Bariga Hargeysa, waxa 28/02/2014ka lagu qabtay Kaah Hotel munaasibad lagu sheegay in ay soo agaasimeen Ururka Tabantaabo oo ka shaqeeya horumarinta Deegaanka Bariga Hargeysa,  oo lagaga hadlayay baahiyaha waxbarasho ee deegaanka Sabawanaag. Madashana waxa lagu casuumay masuuliyiin deegaanka u dhashay iyo Wasiirka Madaxtooyada Somaliland Md Xirsi Cali Xaaji Xasan.

Waxa aanu halkan ka cambaaraynaynnaa shirkaas oo ahaa olole aan heshiis lagu ahayn, ayna soo abaabuleen qayb ka mid ah Ururka Dhallinyarada Tabantaabo oo ah urur samafaleed siyaasadda ka madax-bannaan, laakiin ayaamahn u xuubsiibtay garab ka mid ah loollanka siyaasiga ah ee dalka ka jira si badheedh ahna ula saftay Xisbiga Talada haya.

Waxa aanu ka xunnahay in la majare-habaabiyay agaasinka munaasibaddan, iyada oo la baahiyay in lagaga hadlayo horumarinta deegaanka Sabawanaag, hadafka rasmiga ahina uu ahaa in Wasiir Xirsi iyo xukuumadda loo muujiyo inay taageero ka haystaan deegaannada Bariga Hargeysa. Waxa yaableh in masuulka qaran lagu dabo in la bixinayo lacagtii Waddada Ceerigaabo si uu golaha u xaadiro, waxaanay ahayd laac aan sal iyo raad lahayn.

Dhallinyaro ahaan waxa aanu leennahay

1.Waa wax laga xumaado in arrin ay wataan shakhiyaad gaar ahi lagu tilmaamo dan guud

2.Ma aha wax aanu ogeyn, qabsoomiddiisana waanu ka soo horjeednaa

3.Ummadda Somaliland waxa aan ka raalli-gelinaynaa natiijadii shirkaas ka soo baxday

4.Shacbiga muwaaddiniinta ah ee jecel horumarka, nabadda iyo walaalnimada, waxa aanu ogeysiinaynnaa in aanu qaban doonno kulan ka mug weyn kaas dhinaca u janjeedhay

5.Masuuliyiinta Xukuumadda kaga jirta Deegaanka Bariga Hargeysa waxa aanu ugu baaqaynayaa in ay si kale u raalli-geliyaan Wasiirka Madaxtooyada Somaliland, isla markaana aanay dhex keenin fagaare bulshada deegaanku isku diiddan tahay”

Bayaankan waxa soo saaray

Maxamuud Farxaan Cabdillaahi Guddoomiyaha Dhallinyarada Talo iyo Tawfiiq

Xasan Axmed Xasan (Dhako) Af-hayeenka Dhallinyarada Talo iyo Tawfiiq

Deeq Cabdillaahi Cawaale,  Xoghayaha Maaliyadda Dhallinyarada Talo iyo Tawfiiq

Engineer Qaasin Ismaaciil Xasan

Cabdiraxmaan Maxamed Jaamac

Axmed Faarax Caynaanshe

Ibraahin Aw Aadan Qoobey

Cabdiqaaddir Cali Xaaji Muuse

Maxamed Cabdi Jaamac (Xiddig)

Mubaarik Aadan Bahal

Cabdirisaaq Maxamuud Muxumed (Geed)

Engineer Xamse Maxamed Ismaaciil

Waxaynu ognahay in cadaaladu tahay asaaska nolosha, asaaska Horumarka iyo nabad gelyada.
Madax banaanida nidaamka cadaaladu waa aasaaska nidaamka dawlad nimo iyo kala dambaynta iyo u hogaansanaanta sharciga.
Hadaba waxa maalmahan socday dood ku saabsan madaxbanaanida   nidaamka cadaaladda Somaliland (judiciary system). Garsoorayaal ayaa si badheedh ah u soo bandhigay faragelinta lagu ahyo nidaamka cadaaladda. Isla markiiba koox kale oo ka tirsan bahda cadaaladda oo uu hogaaminayo Gudoomiyaha maxakamadda sare ayaa iyaguna shir jaraaid ku sheegay in cadaaladda Somaliland madax banantahay oo garsoorayaashii hore khaldameen.
Runtii waa nasiib daro in garsoorayaal iyagu soo bandhigay cadaymo iyo cabashooyin ay ka muujiyeen faragelin ay ka tirsanayaan qaar ka mid wasiirada xukuumada, ay garsoorayaal kale oo uu ku jiro Gudoomiyaha maxakamadda sare ay u jawaabaan, halkii ay la safan lahaayeeneen ee ay difaaci lahaayeen madaxbanaanida cadaaladda, waa sheekadii caanka ahayd ee hebelow hebel u jawaab.
Waxaan is waydiinayaa madaxbanaanida nidaamka cadaaladda ma waxa lagu cadaynayaa hadal, warsaxaafadeed iyo  shir jaraaid oo la qabto iyo in la yidhaa cadaaladu way madaxbanaantahay? Sidee garsoore cadayn soo bandhigay garsoore kale ugu jawaabi karaa? Ma taasaa madaxbanaani ah? Miyaanay kashifaad ahayn? Miyaanay siyaasadii qaybi oo xukun iyo hebelow hebel u jawaab u egayn?
Runtii madaxbanaanida cadaaladu way ka balaadhantahay wax hadal iyo sheegasho lagu cadayn karo, waxay leedahay tiirar ay ku taagantahay iyo waxyaalo calaamad u ah oo lagu yaqaan. Waxaan isku deyayaa bal inaan dhawr qodob ka tilmaamo tiirarka aasaaska u ah ee lagu yaqaan cadaaladda madaxa banaana.

Tiirarka Asaaska u ah madaxbanaanida cadaaladda

1.   Madaxbanaanida nidaamka cadaaladu waxa uu ka bilaabmaa qodobo distoori ah oo cadaynaya ama qeexaya nidaamka cadaalada iyo madax banaanida cadaaladda.

2.   Waxa ku xiga Sida loo raaco/dabaqo ama loogu dhaqmo  qodobada distooriga ah ee qeexaya madax banaanida maxakamadaha iyo garsoorayaasha.

3.   Waxa ku xiga  Xulashada garsoorayaal tababaran, aqoon leh, dhex-dhexaada, dhaqan suuban oo ku sifoobay cadaalad kana madax banaan siyaasada iyo wax kastoo bulshadu ku kala qaybsantahay sida qabyaaladda IWM.

4.   Waxa ku xiga  in garsoorayaasha  ay noloshooda iyo baahiyahooda aasaasiga ahi ay daboolan yihiin oo mushaharka ay qaataan si fiican ugu filanyahay inuu daboolo dhamaan baahiyohooda aasaasiga ah.

5.   Waxa ku xiga in garsoorayaasha amaankoodu xafidanyahay oo aan xukun adag oo ay cid ku rideen khatar gelin Karin noloshooda.

6.   Waxa muhiim ah in garsoorayaashu sida wasiirada oo kale helaan additional privileges sida gaadhi fuiican  iyo guri fiican.

Madaxbanaanida maamulka cadaaladda

1.   In maamulka cadaaladu leeyahay miisaaniyad ku filan oo ka  madaxbanaan raali gelinta dawladda oo ku salaysan baahida miisaaniyadeed ee maamulka cadaaladda.(Tolow wasaaradda cadaalada iyo TV-ga qaranka ee lagu faafiyo propagandaha dawlada keebaa miisaaniyad badan?)

2.   In sharci ahaan aan laamaha dawlada ama madaxda dawladu aany soo fara gelin Karin nidaamka cadaaladda isla markaana aanay hor istaagi Karin fulinta go’aamada maxakamadaha.(Tolow wasiirada isku dayay in ay maxakamadda sare u adeegsadaan in ay joojiyaan shirka baarlamaanka, wixii ka sokeeya baarlamaanka ma ka baydhayaan?)

3.   In nidaamka cadaaladu ka madax banaanyahay faragelinta siyaasada, musuqa iyo laaluushka oo cidii lagu ogaado uu ka yaalo xeer adagi.

4.   In go’aanka garsooruhu sidoo kale ka madax banaanyahay rabitaanka khaaska ah ee garsooraha, tusaale ahaan in go’aanka aanu raad ku yeelan nacayb ama jacayl uu garsooruhu u hayo qaar ka mida dhinacyada loo garsoorayo.

5.   In dalacaada garsooruhu aanay ku xidhnayn raali gelinta dawlada si toos ah iyo si aan toos ahayn toona, laakiin ay ku xidhantahay gudashada waajibka shaqada iyo sugida cadaaladda ee dhamaan kiisaska uu qaaday.

Calaamadaha lagu garto cadaaladda madaxa banana

1.  In ay cadaaladu mar walba u hiiliso cida dulman oo qudha, No matter who, xataa hadii ay dacwadu u dhaxayso muwaadin caadi ah iyo  wasaarad ka tirsan dawladda ama ciidanka police-ka oo dulmi u gaystay muwaadin.(Tolow caruurtii badnayd ee ku baxday gacanta ciidanka bilayka cid ma loo qabtay oo cadaalad ma loo sameeyay? Tolow xadhigan maalin walba taagan ee lagula kacayo saxaafadda iyo muwaadiniinta aan dembiga lahayn cadaalad ma lagu dhameeyaa? Tolow cabashadii doorashooyinka degaanka si cadaalad ah ma loo qaaday?

2.  In aan nidaamka cadaaladu ahayn mid cidii awood lihi uun adeegsato ama danaheeda ku gaadho.( Tolow nidaamka cadaalada SL ma dawladuu raali geliyaa oo happy ku ah mise waa mel cidii la dulmayba ku eerato oo cadaalad ka soo hesho?)

3.  In cadaaladda ay isku si uga baqaan waaxaha dawlada, madaxda dawladda iyo muwaadinka caadiga ahi oo aanay u kala dhawayn.

4.  In aan  garsoorayaashu ka wer-werin inay shaqadooda waayaan hadii ay xukumaan goaano aan dawladu raali ka ahayn, ama ay gaadhaan goaamo aan raali gelinayn qaar ka mid ah madaxda sarsare ee dawladda.

5.  In shuruucda iyo nidaamka cadaaladu aanu ahayn mid shabaha xuubka caarada oo qabta cidii awood yar, laakiin aan qaban Karin cidii awood badan leh.

Hadaba waxaynu ognahay in xukuumadan kulmiye markii ay talada dalka qabatay ay bilaa sabab bedeshay Gudoomiyihii maxakamadda sare iyo garsoorayaal tiro badan. Miyaa la odhan karaa cadaaladda Somaliland siyaasada ayay ka madax banaantahay maadaama dawladu hal mar xaaqi karto gudoomiyaha iyo garsoorayaal intii ay doonto oo ay bedeli karto?
Ma la odhan karaa cadaaladda SL way madax banaantahay mar hadii garsoorayaashii soo bandhigayaan faragelinta lagu hayo sugida cadaalada? Ay u jawaabayaan garsoorayaal kale si ay dawlada u raali geliyan, halkii ay intay eegaan faragelinta la soo bandhigay ay dawladda ula xisaabtami lahaayeen?

Waxaan ku soo geba gebaynayaa Umaddu cadaalad ayay rabtaa, waa shacab xariir ah oo xaq u leh in uu cadaalad helo.
Xisbiga waddani waxa uu u arkaa in cadaaladu tahay aasaaska nolosha, aasaaska nabada iyo aasaaska horumarka.

Xukuumada waxaan usoo jeedinayaa in ay ka fogaato faragelinta nidaamka cadaalada, sidaas ayaa dalka dani ugu jirtaa, oo dawlada danteedu ku jirtaa oo dadka dantoodu jirtaa.

Waxa aynu ognahay in waxyaalaha lagu qiyaaso nidaamka dawladnimo ay ka mid tahay cadaalad madax banana oo aan cid gaari ku shaqaysan. Qaramada midoobayna waxay sameeyeen shuruudo laga rabo Nidaamka cadaaladda madaxa banana. Taasi waxay keenaysaa in hadii nidaamkeena cadaaladu uu noqdo mid wasiiradu ku shaqaystaan ay noqonayso arin aan soo dhawaynayn citiraafkii iyo dawladnimadii aynu rabnay.

Alaa mahadleh

Mohamed A. Issa
Xubin Gudiga Arimaha Debedda WADDANI

sidaynu ogsoonahay musharax jamac cali xusen waa nin aqoon yahan ah oo cilmiga heer sare ka garay.
musharax jamal cali xusen intii uu xisbiga musharaxa u noqday maxaynu oran karnaa wuu kuso kordhiyay oo tagero ah maalintii uu unoqday musharaxnimada xisbiga ucid  halkeebu tagna xisbiga ucid,
waxaynu orankarnaa xisbiga ucid halkuu taagnaa malintii uu kuso biray musharax jamal cali xuseen ayuu maanta taagan yahay.
hadaba su aalaha la iswaydinayaa waxay tahay manta jamaal cali xusen waa musharax xisbiga ucid ah waxaa malin dhow loo diyaar garoobaya doorasho waxuu u baahan yahay taagero hadaba ma umuuqdaa mid wadadii uu ku noqon laha musharax gulaysta cagta haya.
jawaabta waa maya,
waxaynu aragnaa musharax jamal oo lasocda gudomiye cabdiraxman ciro oo u madax ah xisbiga wadani,
cabdriaxman ciro waa musharax u taagan jagada madaxwayne nimada waxuuna ku guda jiraa siyaasadii uu ku kasban laha taageero,
jamaal waxaa looga baahnaa inuu cadeeyo siyaasadii uu dalka ku hogaamin laha haduu ku gulaysto, taagerana ugu raadin laha xisbiga uu musharaxa u yahay, ma ahan inuu xisbi kale lasocdo isagoo xisbi madax u ah.
horaa faysal cali waraabe waxaa looga hayaa hadaad ucid codka siin waydaan udub siiyo
oo uu manta leeyahay musharax jamaal cali xusen hadaad xisbiga iyo anigaba nagaran waydaan wadani taageera codkana siyo.

GUNTII IYO GUNAANADKA ANIGOO AH MUSHARAXA MADAXWAYNA MUSTAQBALKA WAXAAN LEEYAHAY MUSHARAX JAMAAL CALI XUSEN HOWL AYAA KU TALA, TAAGERO XISBIGA U RAADI, KUNA FAKAR SIDAAD KU NOQON LAHAYD SIYAASI DIBLAMAASI AH SIDA GUD: CABDIRAXMAN CIRO, ILYARNA WAX KU EEG MARKAAD WAX EEGAYSO SOO JIIDASHANA BADI DADKUNA WAY BADAN YIHINE MID WALBA LASOCO

F:president mohamed osman haji
email:awaadan5@hotmail.com
lasoco warar wacdaraysan waqtina aadan u wayaynin

Hargaysa(HalbeegNews)-Waxaa maalinta bari ah la horkeenaya maxkamda Hargaysa Eedeysanayaashi loo hayay Dilkii ka Dhacay Magaalada hargaysa, Talyahi Ciidanka booliska Somaliland cabdilaahi iiman Fadal Ayaa sheegay in Bari oo Ay tahay sabti la Horkeenayo Maxkadam Cid Kasta oo gacan ku leh Falkani isla Mar ahaantaan uu isagu Gacanta Ku hayo.

Alle Ha U naxariiste Ruqiya Siciid Ayaanle Ayaaa Meedkeda laga helay guri Ay leeyahiin eedeysanayaasha loo hayo iyada oo ku aasan, waxaana Aasa marxumada ka Qaybgakay madax-weynaha Somaliland iyo qaybo Ka mida Golahiisa Wasiirada.

dhacdadani oo aad ugu cusub dhagaha Bulshada ayaa waxaa runtii ay argagax ku beertay dadka aan u dhalan soomaliland isla  mar ahaantaana Ahaa dumarka ka imada Dhulka somalida ee u soo shaqo doonta Hargaysa, kuwasi oo ka cabsi qaba in sidan oo kale ku dhacdo.

sidoo kale waxaa magaalda aan wali ka bixin argagaxa iyo ka sheekeynta Dhacdadani aadka u Foosha Xumaa oo Ahaa Kii ugu horeeyay ee noocana ee ka dhaca magaalada.

Hargaysa(Halbeegnews)-Waxaa Saaka Abaaro 7:00 Subaxnimo la keenay maxkamada Hargaysa Eedeysanayaashi loo Hayay Dilkii Foosha Xxumaa Ee ka Dhacay magaalada hargaysa, Waxaa soo buux dhaafiyay maxkamada Horteeda Dad Ad u tiro badan oo iskugu jira caruur Dumar iyo Waliba Rag kuwaasi oo rabay Habka uu u dhacaayo kiiska Gabdha inay Ogaadaan Balse Nasiibdaro waxaa la xoojiyay Amaanka Maxkamada Iyo Eedeysanayaaasha taasi oo U suurtogali wayday in ay arkaan eedeysanayaasha Dadkaa Soo buux dhaafiyay Maxkamadu.
Abaro 9 oo wax yar dhiman ayaa la soo saaray Eedeysanayashi iyada oo lagu riday gadhiga Qufulan oo ay wateen Ciidanku kaasi oo loo celiyay saldhiga isla marar ahaantaana waxaa uu buuq ka dhashay barxada hore ee maxkamada Iyada oo ay dadku doonayeen in ay arkan gabadha.

Mar aanu isku daynay inaanu wax ka waydiino Guddmiyaha Garsoorka ee hayay kiiskan Ayaa waxa uu sheegay in aanu kiiskan wali soo gaadhin maxkamada balse uu xeer ilaaliyaha Guud wado Dhamaystirka Dacwadani.

Ku-xigeenka xeer ilaaliyaha Gobalka maroodi jeex oo bahda saxaafada la hadlay ayaa sheegay in ay kiiskan Ku guuleysteen ilaa hadana ay u hayaan 7 qof oo ku eedeysan Kiiskani ayaa waxaa uu yidhi Halkan Ka Dhageyso.

kiiskii

Hargaysa(HalbeegNews)-Waa Warbixn Aan idinka soo diyaarinay Eedeysanayaashi Loo Hayay Dilkii ka Dhacay magaalada Hargaysa Kaasi Oo aad Ay dad-weynaha Reer Somaliland Ugu Dhagtaagayeen Ilaa inta Maxkamada La Keenayo  Halkan Ka Dhegayso

Waxaynu maqaalkii kan ka horeeyey kaga soo waranay sida u dhalan gadiska inoogu sameeyay cunista qaadku iyo sida uu inooga dhigay umad fadhiid ah isla markaana dhaqankeena uu u badalay inoonana dhaxalsiiyey doqoniimo iyo masuuliyad daro aan xad lahayn sidaa awgeed inagoo wali sii daba socona waxyeelada qaadku uu u leeyahay bani aadamka iyo sida uu noloshooda ula dagaalamo ayaa maanta waxaan soo qaadan doonaa sida uu bilaa miyirka uga dhigo dadka cuna ama qaadka isticmaala waayo waxaan rabna bal inaan wax uun ka fahano waxyeeladiisa markaa bal aan soo qaadano sheeko kale oo dhacday isla markaana aan afkiisa ka soo qaatay ama aan ka soo xigtay ninkii ay ku dhacday kuna saabsan sida uu miyirka inooga qaado isla markaana inooga dhigo dad waalwaalan oo aan jaho lahayn meel ay u socdaana la garanahayn waana tan ee bal hada iga gudoon.

Bari baryaha ka mid ah ayaa nin reer soomaaliland ah oo dirawal ah ayaa waxaa uu kasoo kicitimay deegaanka jabuuti isagoo raba inuu yimaado magaalada hargeisa isla markaana waxaa uu si aan xad lahayn uga dhargay ama ka hirqaay ama daaqay qaad markuu maraayo meel dhexe ayuu kala wareegay kalana sixi waayey meesha uu u socdo iyo halkii uu kayid dabeeto sida uu iisheegay waxaa uu u jihaystay jaho kale oo aan ahayn tii uu doonaayey waxay jiq isku noqdeen shaqaalihii saarnaa gaadhiga iyo dadkii la socday intaba hase ahaatee waa laga furfuri kari waayey rabitaankiisii ahaa inuu sax yahay dadka oo dhamina khaldanyihiin oo aanay sax ahayn  soomaalidu waxay tidhaa nin meeli u cadahay meeli ka madaw waalaga quustay waxaana loo daayey oo looga hadhay tiisii ahayd inuu sax yahay oo dadku waalwaalan yihiin waa uu dhaqaajiyey gaadhigii waxaanu taayirka saaray wadadii isaga la qumanayd ee uu saxda u arkaayey dadkiina waa saaran yihiinoo waa yaaban yihiin habeenkii oo dhan ayaa waxaa uu jafaayey wado qaldan oo aan ahayn jahadii uu u socday oo ahayd dhinaca magaalada hargeisa dadkii gaadhiga saarnaa waa yaabanyihiin waxay hoosta ka dhahayaan ilaahoow na bixi caawa waa noo dhamaatay.

Ninkaasi odayga ahi sida uu ii sheegay waxaa uu jahadii qaldanayd hayey mudo ku siman 70km hada lasoco waa todobaatan kiiloomitir oo qalad ah oo uu isku arkaayo ninkaasi inuu sax yahay  waxaana uu soo galay tuulo waxaa uu igu yidhi markaan tuuladaasi soo galay ayaan wax kala garatey oo fahamay inaan khaladanaa oo waalaa isla markaana dadku iga saxsanaayeen wanaan istaagay oo shaydaanka iska naaray dadkiina ogaysiiyey inaan waalaa oo aaanan caadi ahayn.

Shidaalkii uu ugu talo galay inuu magaalaa hargeisa ku yimaadaana  waxaa uu ku dhamaaday wadadii qaladka ahayd ee uu jafaayey ninkii odayga ahaa ee waashay qaadka awgii waxa uu qaatay shidaal waxaana uu kalaabtay wadadii oo waxaa uu beegsaday tubtii saxda ahayd hada waa hagaagsan yahay oo waxbuu kala garanahayaa waxaanu ka urugeysan yahay qaladka uu sameeyay waxaanu garan karayaa dhibka uu qaadku u leeyahay caafimaadka qofka gaar ahaan garaadka oo ah wax ama shay qaali ah.

ninkaasi waxaa uu ahaa nin u dhashay garasho ama dadnimo waxaa uu go,aan ku gaadhay inuu iska joojiyo qaadka oo aanu dib ugu noqon waana iska daayey hada waa nin talinaaya oo halka uu garta dhigo aan dib loogu noqonahayn dadkana waa uu uga digaa qaadka iyo cunistiisa waayo waa uu soo arkay waana yaqaanaa waxa uu yahay iyo waxa uu gudo intaba shakina kagama jiro inuu dilaa yahay qaadku.

Hadaba markaan sheekadan dhuuxno miyaaney inooga dhex muuqanahayn inuu qaadku waalida ka kow yahay caafimaad darada dhinaca dhibirkana isagu sababo taasi oo maanta ay dhibanayaal u yihiin dad fara badan oo qaarna suuqyaada wareegaystaan qaarkalena ay eheladoodu geeyeen meelaha lagu daweeyo dadka dhibirka ka buka oo lagu hayo, waxaa kale oo iyaguna ciidaasi ka badan dadka bukaan socodka ah ee isla hadlaaya oo aan tiro lagu koobi karahayn sidaa awgeed waxaan leenahay waar qadku waa dilaaye hala iska daayo oo halaga koro hana la ogaado inuu dabiile yahay dagaala kula jiro faya qabka umada caafimaadkoodana siwayn u dhaawacay miyirkuna waa shayga ugu qaalisan ee ilahay ina siiyey taasi oo aan kaga duwanahay xoolaha loomana baahna inaan si fudud iskaga qaadno waana inaan iska daynaa oo ka fogaanaa kana waantownaa fahamnaana inuu qaadku gacan ku dhiigle yahay oo hadii cid maxkamad dagaal lagayn lahaa laguna eedayn lahaa xasuuq uu qaadka ayahay kan intaba gaystay kuna cadahay inuu intaasiba geystay.

guntii iyo gaba gabadii waxaan dhahayaa qaadku waa dambiile dagaale maxkamad hala saaro oo halala xisaabtamo.

                           W/Q: JAMAAL CABDILAAHI MUXUMED ( ABU CIZA)

Maxamed Aw Xasan, Xildhibaan Rashiid Aw Xasan, Aadan Aw Xasan, Mustafe Aw Xasan, Cali Aw Xasan, Cabdiqaadir Aw Xasan, Cabdilaahi Aw Xasan, Yuusuf Aw Xasan, Aamina Aw Xasan, Sabaax Aw Xasan, Sahra Aw Xasan, Axmed Aw Xasan, Siciid Aw Xasan iyo dhammaanba qoyska balaadhan ee Ilma Aw Xasan Xaaji Aadan meel kasta oo ay daafaha dunida ka joogaan iyaga iyo waxay dhalleenba waxay hambalyo iyo boogaadin aan la koobi karayn hawada u marinayaan, meherka, walaalkood

Cumar Aw Xasan Xaaji Aadan

Iyo Marwadiisa Cusub

Faysa Maxamed Jaamac

Oo meherkoodu 07/03/2014 ka dhacay magaalo madaxda gobolka Saaxil ee Berbera, waxaanay ugu ducaynayaan ducadiisa RASUULKA CSW, “Barakalahu Laka Wa Baraka Calayka Wa Jamaca Baynakum Filkheyr Aw Bilkheyr” Insha Allah

Ilaahay ha ka dhigo qoyskii isku nasta, kala hella ubad kheyr qaba, laguna nasto ee lagu negaado Aamiin Aamiin Aamiin